মুখ্য পৃষ্ঠা
06/04/2514:37
"এটি আশাৰ অপমৃত্যু"
তোমাৰ শুভ বিবাহৰ হোমাগ্নীত ,
মোৰ বুকুৰ চিতাত জ্বলিব
দুবছৰীয়া স্মৃতি |
নিশাবোৰ তোমাৰ বাবে চুটি হ'ব ,
আৰু মোৰ এটা যুগৰ দৰে দীঘল |
সকলো একেই থাকিব
মাথোঁ আবেলি বোৰ সেমেকা লাগিব |
নৈ পাৰৰ আঁহত জোপালৈ বেয়া লাগিব |
দুবছৰীয়া স্মৃতিৰ স্বাক্ষৰ আঁহত জোপা ,
শীত আহিলেই লঠঙা হ'ব |
বসন্তত ন-সাঁজেৰে স্মৃতি ৰুমন্থন কৰিব |
তোমাৰ বিয়াৰ প্ৰথম বাৰ্ষিকীত ,
মই পালন কৰিম মৃত সপোনৰ তৃতীয়
বাৰ্ষিকী |
এটুপি মদিৰাৰে ৰাঙলী কলিজা তিয়াই
ব্যৰ্থ জীৱনৰ উত্সৱ পাতিম |
তোমাৰ শিৰত জিলিকিব সেন্দুৰ ,
ডিঙিত জিলিকিব মণি-মুকুতা |
আৰু মোৰ উৱঁলি যোৱা চোলাৰ জেপত ,
ভাজ হৈ থাকিব এখনি চিঠি |
দুখ বোৰ চিৰদিনলৈ একেই থাকিব ,
সলনি হ'বা মাথোঁ তুমি
এদিন আনৰ পত্নী ,ক্ৰমশঃ মা...
মই থাকিম একেদৰেই ,
প্ৰতাৰিত প্ৰেমিকৰ এসাঁজ কাপোৰ
পিন্ধী |
পশ্চিমৰ আকাশলৈ চাই হুমুনিয়াহ এৰিম ,
সুখ বোৰ তোমাতেই অৰ্পণ কৰিম |
তোমাৰ শুভ বিবাহৰ দিনা ,
মই বুকুত চিতা সাজি জ্বলাম
দুবছৰীয়া স্মৃতি |
© ৰাজু কলিতা
....10/14
